2011-06-02

25 يناير


أحترت بصراحة وانا ببدأ أول تدوينة فى أسم للعنوان وبرضة احترت ابتدى بإية كموضوع انا قلت أبتدى والكلام هايجيب بعضة , ملقتش غير تاريخ الثورة كأحسن عنوان لأنى مظنش ان فى حاجة فى مصر دلوقت اهم من التاريخ دة , مصر دلوقت عاملة زى واحدة لسة والدة جديد والناس واقفين حواليها قاعدين بيتكلموا وبيتخانقوا وسايبنها وسايبين الوليد الجديد , كل واحد عايز يسمى الوليد على اسمة اصلة غنى واللى هايبقى على اسمة هاياخد من وراة كتير كل واحد عايز ياخد نصيبة من المولود محدش عايز ياخد بالة منة ويكبرة مع ان المولود دة مش من حق اى حد من اللى بيتكلموا هو من حق ناس مش قادرة تتكلم او توصل صوتها من حق الشعب اللى قام بالثورة , ماهى ثورة شعب , شعب اتبهدل مش فى عصر مبارك بس شعب معملش ثورة على مبارك بس لأ دة عمل ثورة على كل العصور اللى عاشها قبل كدة من زمان فوق ما نتصور أول ثورة فى مصر تكون بجد من الشعب , الشعب فعلا هو اللى قام بيها مش حد تانى , أعظم تاريخ فى مصر هو 25 يناير ثورة اللوتس على ضفاف النيل , مصر دلوقت فيها مكلمة كبيرة اوى كل واحد بيدور على مصلحتة محستش من أى حد فيهم انة بجد خايف على مصلحة الشعب والله أعلم بنيتهم طبعا بس انا مش حاسس بحد فيهم غير قليلين جدا جدا ودول صوتهم مش طالع علشان كالعادة إللى عايز المصلحة مصلحتة غيرة يسكت , كلة بيقول البرنامج بتاعى صح والباقيين غلط ماهو ربنا وزع العقول على الناس كل واحد رضى بعقلة ووزع الأرزاق محدش رضى برزقة فكل واحد شايف نفسة صح كل الناس عاملة نفسها وصية على الشعب كل واحد شايف نفسة اقدر بالقيادة , حتى لما قالوا أصل الشعب قال كلمتة فى الأستفتاء محدش فكر إن إللى قال أة قال اة لأنة كان خايف لأنة شايف أن محدش خايف علية , الشعب خايف وعايز يخلص بسرعة اصلة لسة صغير مش بقولك مولود لسة مش متعود على الحرية مش متعود يروح المدرسة لوحدة متعود حد يودية المدرسة كل يوم علشان كدة يوم لما راح لوحدة كان خايف اصلة مش فاهم كل واحد يقلة السكة من هنا السكة دى صح كل واحد يشاورلوة وهو مش عارف وخايف , لما يبقى اللى ليهم حق فى الأستفتاء 45 مليون نسمة واللى يقولوا اة 14 مليون وإللى قالوا لأ 4 مليون انا مش معترض على دول ولا على دول اصل خلاص بقا فية حرية انا بس بدور على ال 27 مليون إللى لا قالوا أة أو لأ كل البشر اللى بيتكلموا محدش فكر فيهم , كل البشر اللى بيتكلموا أخد فريق طيب محدش فيهم فكر فى ال 27 مليون منزلوش لية طيب , هما مين فى الشعب , ولا الهوا مش بقولك لو بيدوروا على المصلحة كانوا دوروا على دول اللى ليهم مصلحة فى اة مسكوا فى ال 14 مليون واللى ليهم مصلحة فى لأ قالوا ال 14 مليون كانوا مغيبين ومنقادين ورا شعارات برضة مش قصتنا , فين ال 27 مليون من تفكير البنى ادمين دول علشان كدة انا مش حاسسهم كل بيدور على مصلحتة ,ومش يمكن الناس دى عايزة حسنى مبارك , وبرضة مش عايز حد يفهمنى غلط ولا يقولى اصل الشعب مش اهبل ولا مش عارف هو عايز إية ولا حد يقولى انت بتهمش الشعب أو بتتهمة بأنة مغيب او او ... وحد هايقولى الشعب اللى مشى حسنى مبارك عارف هو عايز إية طبعا انا فاهم دة كلة وبرضة الناس فاهمة قصدى إية,  انا مش هاقول انى مدورتش على الناس دى دورت ولقيت فى السكة ناس وناس كتير من كل فئات المجتمع والله العظيم ناس ماعرفة حاجة ولا فاهمة حاجة ولا درايانين ناس مطحونة لأقصى درجة ولا حاسين بحاجة ولا اللى فوق حاسين بيهم دة غير اللى برضة مالهمش الحق فى التصويت نصهم برضة نفس الموضوع وبرضة محدش حاسس بيهم مش بقولك محدش راضى برزقة وكلة راضى بعقلة .